Prolla

A prolla

A prolla de Pontedeume confúndese ás veces coa bola larpeira ou a bola de manteiga que se fan noutras zonas da comarca, pois comparte as mesmas materias primas. Porén, é unha bola cuxo aspecto pouco lévedo, que a distingue moito destas derradeiras, llo confire a elevada materia graxa que contén e a consistencia pegañenta da masa. A base desta sobremesa é a manteiga. Obtíñase ao remexer pacientemente e mazar a tona crúa do leite sen pasteurizar nunha manteigueira. Despois dunha moi lixeira fermentación ou maduración - canto maior sexa a maduración máis agria resultará a manteiga - sepárase a materia graxa, ou manteiga, do leite remexido, que se pode beber. Para elaborar un quilogramo de manteiga precisábanse uns vinte litros de leite enteiro e crú de vaca. É por isto polo que se poderá deducir que resultaría antigamente unha sobremesa custosa reservada quizabes só á celebración das esmorgas familiares. 

Faise a masa con manteiga e azucre dabondo, canela en pó e fermento orgánico. Exténdese con dificultade sobre unha lata baixa de aceiro estanado e complétase cunha costra de azucre. Despois de cocida adóitase, segundo é tradición, bañar en augardente de anís, anque o lóxico sería que antigamente se fixera con fiollo, pois é o máis abundante na zona.